Pas më shumë se një shekull heshtjeje, Hamami i Durrësit u mbush sërish me zërat e qytetit. Mbrëmjen e 19 qershorit, qindra vizitorë morën pjesë në “Natën Kulturore Epidamn”, ngjarja e parë artistike që zhvillohet në ambientet e monumentit pas restaurimit të mbështetur nga programi EU4Culture.

Atmosferë osmane e sjellë në të tashmen

Në “Sheshin e Zanateve”, mjeshtri i qeramikës Agron Fusha modeloi në çark enë balte sipas traditës së hershme durrsake, ndërsa artizani Donald Llaperi riprodhoi vetë Hamamin në miniaturë duke përdorur teknikën quilling me shirita letre. Aktori Alesio Hysenaj – në rolin e tregimtarit “Halili” – rrëmbeu publikun me histori nga kronikat osmane të Evliya Çelebi, ndërsa violonçelistja Emily Spahiu ndërthuri tinguj meditative mes harqeve të guri­t.

Kulmi muzikor: “EKUILIBËR / Equilibrium”

Performanca njëorëshe “EKUILIBËR” i bashkoi ritmet e Erdit Asllanajt (Hang, didgeridoo, daulle), Anastas Lakos (bouzouki) dhe vokalet e Denada Kardhashit në fragmente isopolifonie, duke krijuar një udhëtim sonor që ndërtoi urë mes kulturave.

Projeksione AI: Durrësi i vjetër në muret e reja

Ndërkohë, fasada e Hamamit u shndërrua në një ekran të gjallë falë projeksioneve të realizuara nga projektuesi Kudret Plaku: imazhe të animuara me inteligjencë artificiale sollën në jetë rrugën e Kalasë, Kullën Veneciane dhe pazaret e dikurshme, duke i vendosur krah për krah me siluetat e sotme të qytetit.

Aktiviteti u zhvillua në kuadër të projektit “Trashëgimia Epidamn: Lidhja midis së Shkuarës dhe të Tashmes”, zbatuar nga Durrësi Aktiv dhe MuZEH Lab në partneritet me Qendrën Muzeore Durrës. Projekti financohet nga Bashkimi Evropian përmes EU4Culture dhe zbatohet nga UNOPS në bashkëpunim me Ministrinë e Ekonomisë, Kulturës dhe Inovacionit (MEKI).